حقيقى ياعينى علينا
- لو واحد فينا اختاروه مشرف أو رئيس لجنة انتخابات فسيضطر اضطرارا الى التزوير عشان هو عبدالمأمور , يعنى يضيع وظيفته وشغله عشان احنا ننتخب. حد فينا جرب أو حط نفسه مكان الراجل اللى خايف على رزقه ورزق أولاده وفلوس الدروس والأكل , المسأله معناها انه يجوع هو وعياله , محدش فينا عنده مخزون من أى حاجة , يعنى لو اترفد أو اتحول للتحقيق النهارده ممكن أولاده ماياكلوش بكره , وطبعا مراته هاتشلأله وتقول له " يعنى كان لازم تعمل فيها شريف يابو مجدى, أدينا اتشردنا وجعنا " , و أولاد الحلال بيختاروا الناس دى بناء على معايير محددة , يعنى مايكنش عنده شخصيه ولا بيفكر ولايكون عنده حساب فى البنك ولا رصيد بأى صورة ولا ورث ولا عيلة تساعده ولا ولا ولا ....
يارب الناس تقرا الموضوع للأخر ويستفيدوا بيه, يارب , يارب , يارب , يارب.
- كل واحد فينا بيبص للباقيين وبيقول " ياترى هايعملوا ايه ؟ "
- روح الفردية قتلتنا , من المعروف عن المصريين دلوقتى إننا ممكن نعمل معجزات ولكن كل واحد لوحده , يعنى كل ما زاد عدد المشاركين فى أى عمل أصبح احتمالات فشله أكبر.
- احنا عبيد حكامنا , بدءا من رئيس أى حاجة الى رئيس أكبر حاجة مرورا بالعضو المنتدب ورئيس مجلس الإدارة, فكل منهم هو رجل ملهم لايخطئ وإن أخطأ فهو من حقه , وكده له أجر واحد وليس أجرين, كويس انه وافق على كده كمان.
- ضيعنا قيمة العلم والعلماء, اتخن عالم بيقبض فى شهر اللى بتقبضه أهيف رقاصة فى ليلة.
- دمه تقيل, ده بأه أى واحد يحاول يصلح أو ينصح.
- رخم أوى , ده اللى يحاول يقف والإشارة حمراء برغم عدم وجود العسكرى.
- هو مال أهلك, كلمة بنقولها لمن يحاول منع لص من سرقة المال العام.
- معلش, كلمة يقولها واحد حرق جاكت بدلتك بسيجارته , وانت لازم تسيبه , ما هو اعتذر لك , يعنى هانقتله عشان الجاكت بتاعك.
- واحد رافع ايده وبيبتسم , ده بأه سائق ميكروباص ماشى عكس ( يعنى فى الاتجاه الخطأ ) , ومادام ابتسم ورفع ايده فانت لازم توسع له عشان تكون متعاون.
- ليه , محدش عارف بيعمل ايه ليه, يعنى الطالب رايح المدرسة أو الجامعة أو الماجستير ومابعده وهو مش عارف ليه,وبالتالى مش عارف هايعمل ايه فى ايه امتى وازاى, والموظف رايح شغله ومالوش هدف ولا بيشارك فى اتخاذ أى قرار , حتى المكان اللى يقعد فيه , طبعا دى سياسة عليا ونظرة مستقبليه , مايفهمهاش إلا السيد المدير الكبير.
- l
- مصيبة كبيرة , دى بأه فيها دراسات وكتب بس محدش بيقرأ, ايه هى؟ أقوللك , عدم المساواة, يعنى فى أمريكا مش مهم انت حاصل على ايه شهادات أو وظيفتك ايه مادمت خرجت من عملك, ممكن أنا وانت والفرق بيننا فى العلم والشهادات والمناصب كبير ونكون جيران أو نسايب لإننا بشر من بنى آدم زى بعض, محدش فينا بيترسم على الثانى ولا بيحتقر الثانى ولا حاسس بالنقص قدام الثانى, احنا بشر وفى عندنا مساواه, يعنى زى ماقال سيدنا محمد عليه الصلاة والسلام ( وكل الأديان ) بس احنا مابنعملش بالدين, عشان الدين ده فى المسجد والكنيسة وبس.
- حسب الظروف , يعنى القاعدة المعروفة بيختلف تطبيقها باختلاف الظروف , يعنى ممكن أشهد بالحق لو كان على حد غريب , وممكن أعطيك حقك بالكامل لو كان بيننا معرفة أو ( مصلحة ) , من غير كده يبقى فى تطبيق مختلف للقواعد كلها.
- l
- إن كنت وصلت معايا للسطر ده يبقى انت عايز تعرف أو موافقنى أو عندك صبر كفاية أو عندك وقت أو أنا صعبت عليك أو حبيت تجرب , على كل الأحوال أنا باشكرك جدا.
- ياريت تحاول تعمل حاجة , أى حاجة, أنا عن نفسى بدأت بس مش هاقوللك ازاى , عشان أديك فرصه تشغل مخك.
- مطلوب مننا نفكر فى الحل , كفاية كلام , طبعا مانسكتش , بس الكلام مش هو كل حاجة, يعنى فكر , اتكلم مع الناس , علم الناس , إنشالله فى المترو أو الأتوبيس أو زملاءك فى العمل أو جيرانك , وطبعا لازم تبدأ بأولادك واخواتك وأبوك وأمك واصحابك.
- انت لازم تبدأ ترفع من مستوى نفسك فى أى حاجة وكل حاجة, لازم نرجع نقرا تانى , الأجانب لاينقطعوا عن القراءة حتى على شاطئ البحر أو فى الرحلات أو النوادى.
- ساعد غيرك , لازم دايما تضيف حاجة لأى حد, فكر فى أولاد الناس انهم أولادك , فكر فيه إنى أخوك , ياريت تفكر فى أخوك انه انت وإنكم بتكملوا بعض.
- كفاية تليفزيون بأه , استفيد من وقتك , زور قرايبك , اقرا كتاب , اقعد مع اسرتك, علم أولادك, علم زوجتك.
ملحوظة: كان نفسى ألتزم بقواعد اللغة العربية , يعنى أقول زر بدل زور , وأقول كفى بدل كفاية , وأقول فى بدل فيه , بس خفت البعض مايفهمش أو يستتقل الموضوع. سامحونى.
احتراماتى والسلام
تاريخ التسجيل
الخميس 16 ديسمبر 2010, 15:22
